Admin
Admin
عدد الرسائل : 832
تاريخ التسجيل : 18/02/2007
 | موضوع: عودة حصاوي حصاوي والمظاهرة  الثلاثاء فبراير 27, 2007 2:19 am | |
| عودة حصاوي
حصاوي والمظاهرةكتب : لينين الرملي
(يدخل المقهي شاب في العشرين, ملابسه ممزقة يجلس بجوار حصاوي بلا استئذان. ويطلب من الجرسون بصوت مبحوح واحد شاي)
حصاوي: مال صوتك يا بني؟
الشــاب: خدت بالك ؟ صوتي مبحوح عشان كنت في مظاهرة سياسية
حصاوي: خيـــر؟
الشــاب بحماس) كنت ماشي مع جماعة من اصحابي لقيت مظاهرة بتشتم في أمريكا. دخلنا معاهم وقعدنا نهتف تحيا مصر وتسقط امريكا. الناس رايحة وجاية تبص لنا أو تقف تتفرج علينا, وفيه ناس بقت تخش, وتهتف معانا عشان تشجعنا وبعدين تمشي تروح اشغالها.. وييجو غيرهم. بصينا لقينا عربية شرطة جت وقفت قصادنا. بتتحدانا يعني واخد بالك ؟
حصاوي: آه واخد.
الشــاب: بس أحنا ما همناش.. فضلنا نهتف بصوت أعلي, ونزلنا من ع الرصيف لوسط الشارع, والعربيات وقفت, ظابط جه وقال لنا هتعطلوا المرور هلمكم كلكم في البوكس.. فكرنا هنخاف.. ما همناش.. الظابط شاور للعساكر, لقيناهم داخلين علينا, برضه ما همناش, حدفناهم بالطوب وجرينا, جريو ورانا.. بقي كل تلاته منهم يمسكوا واحد مننا ويزقوه لحد البوكس, اللي يعافر معاهم يضربوه.
حصـاوي: وانت عملت إيه؟
الشــاب: قاومت طبعا. اللي جري.. جري والباقي أتقفش. انا رميت نفسي علي الأرض وقلت مش هياخدوني غير جثة, وكل ده وأنا بهتف.. بالطول بالعرض هنجيب أمريكا الارض.. البوكس كان صغير واتملا. الظابط اتضايق وبص في ساعته وشاور لهم يسيبوني.
حصـاوي: وبعدين ؟
الشــاب: ولا قبلين. الظابط ركب والعساكر وراه. جريت ورا البوكس وقعدت اهتف لوحدي.. تحيا مصر. تسقط كوستاريكا.
حصــاوي: كوستاريكا ؟
الشـاب: انا قلت كوستاريكا ؟ معلش.. سوري, لخبطت من كتر التعب, قصدي امريكا طبعا, بتضحك ليه ؟ هو فكرك يعني كوستاريكا تتخير عن أمريكا ؟
حصاوي: وانت هتعمل إيه دلوقتي؟
الشــاب: أنا كنت متفق مع صحابي نروح الفيلم الجديد بتاع محمد سعد أو حفلة تامر حسني, ودلوقتي بعد ما اتمسكوا, مش عارف أعمل إيه.. والبروبلم المشكلة يعني, أني لو رجعت وأبويا شافني بالمنظر ده هيقولي دا بدل ما تدور لك علي شغلانة تشتغلها يا فالح.. حاكم هو زي معظم جيلكم ما لوش في الوطنية.
(حصاوي يغشي علي في الحال)
ســـــــــــــتار | |
|
